Wednesday, September 7, 2011

కారణం లేకుండా హడలెత్తించే పానిక్ డిసార్డర్

తీరగ్గా టీవీ ముందు కూర్చొని కామెడి చానల్ చూస్తోంది 27ఏళ్ళ వసంత. అప్పటి వరకూ కామెడీ సీనులో లీనమయి నవ్వు కుంటున్న వసంతకు ఒంట్లో ఏదో తేడాగా అనిపించ  సాగింది. ఏమి జరుగుతుందో స్పష్టంగా తెలియటం లేదు. గుండె వేగంగా కొట్టు కుంటుంది. ఏదో తెలియని భయం. గుండెల్లో నొప్పిగా, అదిమినట్టు ఉంది. ఊపిరి ఆడటం కష్టంగా ఉంది. గుండె ఆగి పోతుందేమో అన్నట్టు ఒణికడం మొదలైంది. ఎక్కడ బాలెన్సు తప్పి పడి పోతానో అని పరిగెత్తుకుంటూ ఎదురింటి మీనాక్షి తలుపు తట్టి రొప్పుతూనే పరిస్థితి చెప్పింది. సమయానికి మీనాక్షి భర్త వెంకట్రావు ఇంట్లోనే ఉన్నాడు. దంపతులిద్దరూ కంగారు పడి పోయారు. ఏమయిందో ఏమో అని భార్య భర్తలు ఆమెను గబగబా కారులో ఎక్కించుకొని ఆగమేఘాల మీద ఆసుపత్రికి తీసుకెళ్ళారు. దారిలో మీనాక్షి ఒడిలో పడుకున్న వసంత భయంతో రొప్పుతూనే ఉంది. మీనాక్షి ధైర్యం చెప్పటానికి ప్రయత్నిస్తోంది కానీ అవేమీ వసంతకు ఎక్కటం లేదు. కారు వచ్చిన స్పీడు చూసిన ఆసుపత్రి సిబ్బంది గబగబా వసంతను స్ట్రెచ్చరు మీద పడు కోబెట్టి ఎమర్జెన్సీ వార్డు లోకి తీసుకెళ్ళారు. డాక్టరు ఆమెను చూసి వెంటనే ఈసీజీ తీయించాడు. తక్షణ పరీక్షలు అయ్యాక ప్రమాదం ఏమీ లేదని చెప్పి అయినా అబ్జర్వేషను కోసం ఐసీయుకి మార్చారు. కానీ ట్రీట్‌మెంటు కూడా మొదలు పెట్టక ముందే వసంత పరిస్థితి కుదట పడింది. రెండో రోజు తీరిగ్గా మిగిలిన పరీక్షలు కూడా చేసి గుండె జబ్బు కాదని, టెన్షను పడటం వల్ల అలా జరిగిందని చెప్పి ఓ యాభై వేలు బిల్లు చేతిలో పెట్టారు. 
                          
                    **************************************************

చూడ టానికీ, విన డానికి అచ్చం గుండె పోటును తలపించే వసంత పొందిన లక్షణాలను ‘పానిక్ అటాక్స్’ అంటారు. ఇది గుండెకు ఏ మాత్రం సంబంధం లేని, మనసుకు సంబంధించిన దిసర్దారు లక్షణం. దీనికి కర్త,కర్మ,క్రియ అన్నీ మనసే. 

మామూలుగా అయితే భయ పడటానికి చిన్నదో, పెద్దదో ఒక కారణం అంటూ ఉండాలి. కానీ బయటి కారణం అంటూ ఏమీ లేకుండా హఠాత్తుగా మనసులో కలిగే భయం, దాని తాలూకు శారీరక లక్షణాలు కలిపి కొంత సేపు మనిషిని ఊపి పడేస్తాయి. దీని లక్షణాలు గుండె పోటును తలపిస్తాయి.

ప్రతివారికి జీవితంలో ఏదో ఒక సందర్భంలో ఇలాంటి ‘పానిక్ అటాక్’ అనుభవానికి గురయ్యే అవకాశం ఉన్నప్పటికీ కొందరిలో చాలా తరచుగా వస్తుంటాయి. వచ్చిన ప్రతిసారీ ఆసుపత్రికి పరిగెత్తటం, ఒక రోజు ఆసుపత్రిలో ఉండి బిల్లు కట్టి రావటం, ఇదే దరువుగా ఉంటుంది. పానిక్ అటాక్స్ ఇలా తరచూ వచ్చే జబ్బును ‘పానిక్ డిసార్డరు’ అంటారు. జబ్బు పలానా అని కనుక్కోనంత వరకూ వీరు గుండె డాక్టర్ల చుట్టూ తిరుగుతూ ఉంటారు. కానీ ఫలితం ఉండదు. ఒక అంచనా ప్రకారం గుండె జబ్బుల ఐసీయులో పది మంచాలు ఉంటే కనీసం రెండు మంచాలలో ఈ పానిక్ డిసార్డరు రోగులు పడుకొని ఉంటారు. సమస్య మానసిక రోగం కాగా వైద్యం జరిగేది గుండె జబ్బుల డిపార్టుమెంటులో.

కారణాలు: 
ప్రమాదాల నుండి, అపాయాల నుండి మనల్ని మనం రక్షించు కోవటానికి ప్రకృతి మన మెదడులో భయం అనే ఆయుధాన్ని ఉంచింది. అయితే భయాన్ని పర్యవేక్షించే కేంద్రం అవసరం అయినప్పుడు మాత్రమే పని చేయాలి. అంటే ప్రమాదం ఎదురు అయినప్పుడు అపాయం జరిగినప్పుడు లేదా జరగ బోతుందనే ఆలోచన వచ్చినప్పుడు భయం కేంద్రం పని చేయటం మొదలు కావాలి. పుట్టే భయం తీవ్రతను బట్టి మనం జాగర్తలు తీసుకొని ప్రమాదం నుండి బయట పడతాం. కానీ పానిక్ డిసార్డరు రోగుల్లో ఈ భయం కేంద్రం ఏ కారణం లేకుండా ఉన్నట్టుండి పని చేయడం మొదలు పెడుతుంది. కాసేపటికి దానంతట అదే సర్దుకుంటుంది. పని చేసిన ఆ కొద్ది సమయం రోగి దుంప తెంచి పడేస్తుంది. ఇలా ఎందుకు అనేందుకు ఇదిమిద్దమయిన కారణాలు తెలియటం లేదు. 40శాతం కేసుల్లో జన్యుపరమయిన కారణాలు కనిపిస్తున్నాయి.

ఆల్కహాలు, మాదక ద్రవ్యాలు వాడే వారిలో పానిక్ డిస్డారీరు ఎక్కువగా కనిపిస్తుంది. పానిక్ దిసార్దారు సాధారణంగా 25-30 ఏళ్ళ వయసులో మొదలవుతుంది. కానీ కొద్ది మందిలో ఎప్పుడూ అయినా మొదలు కావచ్చు. మగ వారిలో కంటే ఆడవారిలో దాదాపు రెట్టింపుగా ఉంటుంది. పిల్లల్లో కూడా రావటానికి అవకాశం ఉన్నప్పటికీ సాధారణంగా వారు పెద్దగా పట్టించు కోరు. వయసు పెరిగే కొద్ది దాన్ని గురించి పట్టింపు ఎక్కువ అవుతుంది.

లక్షణాలు: పానిక్ అటాకు ఉన్నట్టుండి హఠాత్తుగా మొదలవుతుంది. మొదలయిన 10-15 నిమిషాలతో తీవ్ర స్థాయికి చేరుతుంది. ఇలా మొదలయిన లక్షణాలు సాధారణంగా గంట, గంటన్నర ఉండి ఆ తరువాత దానంత అదే తగ్గిపోతుంది. కొంత మందిలో లక్షణాలు గంట కంటే ఎక్కువ సేపు ఉండ వచ్చు. పానిక్ లక్షణాలు ఇలా ఉంటాయి.
  • గుండె దడ, గుండె వేగంగా కొట్టుకోవటం, గుండెల్లో నొప్పిగా ఉండటం లేదా అదిమేసినట్టు, పట్టేసినట్టు ఉంటుంది.
  • ఊపిరి ఆడనట్టు గాలి చాలనట్టు ఉంటుంది. శ్వాసవేగం ఎక్కువ అవుతుంది. అలాగే శ్వాస తీసుకునే లోతు కూడా ఎక్కువగా ఉంటుంది.
  • కళ్ళు తిరిగినట్టు ఉండటం. పడి పోతామేమో అన్న భావన ఉంటుంది. తక్షణమే ప్రాణం పోతుందేమో అనిపిస్తుంది.
  •   తన మీద తనకు అదుపు తప్పేటట్టు ఉందని అనిపిస్తుంది.
  • పరిసరాల నుంచి తాను వేరు అయి పోతున్నట్టు, వాస్తవ పరిస్థితుల నుండి దూరం అవుతున్నట్టు, ప్రకృతితో కరిగి పోతున్నట్టు ఉంటుంది.
  •   కడుపులో దేవుతున్నట్టు, వాంతికి వస్తున్నట్టు అనిపిస్తుంది.  
  • కాళ్ళు, చేతులు మొద్దుబారి పోతున్నట్టు, సూదులు గుచ్చుతున్నట్టు లేదా తిమ్మిర్లు పడుతున్నట్టు ఉండవచ్చు
  • ఒళ్ళంతా చల్లబడి పోవటం లేదా చెమట పట్టటం కొందరికి ఒంట్లో నుండి సెగలు వస్తున్నట్టు అనిపిస్తుంది. 

పైన చెప్పిన లక్షణాలు అన్నీ అందరిలో ఉండక పోవచ్చు. కొందరిలో కొన్ని అదనపు లక్షణాలు కూడా కన పడవచ్చు. పానిక్ డిస్డారు ముఖ్య లక్షణం ఏమిటంటే పానిక్ అటాక్ లక్షణాలు తగ్గిన తరువాత మళ్ళీ వస్తుందేమో అన్న భయం ఎక్కువగా ఉంటుంది.

ఏమి చేయాలి?
పైన చెప్పిన లక్షణాలు ఎవరికి అయినా కనిపించినప్పుడు గుండె డాక్టరు దగ్గరకు పోతారు. ఒక వేళ అవి గుండె జబ్బు వల్ల వస్తే ఇది ఫలానా కారణం వల్ల వచ్చిందని దానికి వైద్యం చేస్తారు. కానీ గుండె కారణం కాదని చెప్పినప్పుడు ఇలాంటి లక్షణాలు గుండె సంబంధమయిన జబ్బులు ఏమీ లేవని డాక్టరు చెబితే మానసిక వైద్యుడిని కలవాలి. మందులతో బాగా అదుపులోకి వస్తుంది. మందులు లేని చికిత్సా పద్ధతులు అయిన కాగ్నాటివ్ బిహేవియరల్ థెరపీ కూడా బాగా ఉపయోగ పడుతుంది.

Wednesday, August 31, 2011

మీ పిల్లలు సరిగా నిద్రపోతున్నారా?


పిల్లలు అన్నాక ఏదో ఒక దానికి పేచీ పెట్టటం, నస పెట్టటం మామూలే. ఎప్పుడో ఒకసారి నస పెడితే ఏదో ఒకటి చేసి బుజ్జగించటం ప్రతీ తల్లిదండ్రికి ఆనవాయితీనే. అయితే కొంత మంది పిల్లలు అయిన దానికీ కాని దానికి నస పెడు తుంటారు. ఈ అలవాటు మాన్పించాలని ఎన్ని ప్రయత్నాలు చేసినా ఉపయోగం లేక పోవచ్చు. చాలా సార్లు వీరి నసను భరించ లేని తల్లిదండ్రులు పిల్లల వీపు విమానం మోత మోగించటం కూడా తరచూ జరుగుతూ ఉంటుంది. పిల్లల్లో ఉండే ఇలాంటి ప్రవర్తనకు కారణాలు గుర్తించి దాన్ని మలుపు తిప్పకపోతే కారణాన్ని బట్టి శారీరక ఎదుగుదలలో, వ్యక్తిత్వం రూపు దిద్దు కోవటంలో తేడాలు రా వచ్చు.
 

అలవాటుగా నస పెట్టే పిల్లలందరినీ జాగర్తగా గమనిస్తే నస ప్రవర్తనకు ప్రధానంగా రెండు కారణాలు కనిపిస్తాయి. అందులో తొలి కారణం పెంపకంలో లోపం కాగా మలి కారణం పిల్లలకు నిద్ర చాలక పోవటం.

తల్లిదండ్రులు లేదా కుటుంబ సభ్యులు పిల్లల్ని అతిగా గారాభం చెయ్యటం, మరీ సున్నితంగా పెంచటం వల్ల వారికి మొండితనం అలవాటు అవుతుంది. ఇలా పెరిగే పిల్లలకు పట్టు విడుపులు అలవాటు కావు, కుటుంబం మొత్తానికి తనే కేంద్రం అనే భావన వారిలో నాటుకు పోతుంది. దాంతో తాము ఆడింది ఆటగా పాడింది పాటగా అనుకుంటారు. వారు కోరింది సమకూర్చి పెడితే, లేదా చెప్పినట్టు పెద్ద వారు నడుడుచుకుంటే సరేకానీ లేకుంటే రచ్చకు మల్లుకుంటారు. ఇలా సమకూర్చి పెట్టటం అన్ని సందర్భాలలో తల్లిదండ్రులకు వీలు పడక పోవచ్చు. అలాంటప్పుడు సాధించుకునే మనస్తత్వం అలవడుతున్న పిల్లలు పేచీకి దిగుతారు. అనుకున్నది సాధించు కోవటానికి తల్లిదండ్రుల మెడలు వంచ టానికి వారికి ఉన్న ఒకే ఒక దారి నస పెట్టడం... రాను రాను అది అలవాటుగా మారుతుంది. ఇలాంటి ప్రవర్తన లేత దశ లోనే గుర్తించి కట్టడి చేయక పోతే వారి వ్యక్తిత్వ ఎదుగుదలలో ఈ ప్రవర్తన అలాగ నిలిచి పోతుంది. కాకుంటే పెద్ద అయ్యాక నస పెట్టే రూపం మార వచ్చు           
ఇక రెండో రకం పిల్లల్లో ముందు చెప్పిన సమస్య లేక పోయినా అప్పుప్పుడు కానీ, తరచూ కానీ నస పిల్లలుగా మారుతారు. ఈ పిల్లల్ని పెంచటం లోపం ఏమీ ఉండదు. పిల్లలు కూడా కావాలని నస పెట్టే రకాలు కాదు. వీరి నసకి కారణం తగినంత నిద్ర లేక పోవటమే. పిల్లలు వారి వయస్సుకు తగ్గట్టుగా తగినంత సేపు నిద్ర పోతే రోజంతా హుషారుగా, చలాకిగా ఉంటారు. నిద్ర చాలనప్పుడు వచ్చే అనేక సమస్యల తోపాటు నస పెట్టటం కూడా ఒకటి.పిల్లల ఎదుగుదలను తిండి తరువాత నిద్ర అత్యంత అవసరం. అటు శరీర పెరుగుదల, మెదడు వికసించటం రెండూ దాదాపు నిద్రలోనే జరుగుతాయి. నిద్ర విషయంలో పెద్ద వారి లాగే పిల్లలు కూడా ఎవరికి వారు ప్రత్యేకమే. నిద్ర తగిన పిల్లల్లో ఎదుగుదల సమస్య లతో పాటు ప్రవర్తనలో కూడా తేడా కన పడుతుంది. అయితే తేడా చంటి పిల్లల్లో ఒక రకంగా ఉంటుంది. పెద్ద పిల్లల్లో మరో రకంగా ఉంటుంది. చంటి పిల్లలు అయితే నిద్ర చాలనప్పుడు ఊరికే ఏడుస్తూ ఉంటారు అదే పెద్ద పిల్లలు నస పెడుతుంటారు.ఎవరు ఎంతసేపు నిద్ర పోవాలనే దాంట్లో కొంత మినహాయింపులు ఉన్నప్పటికీ, నాలుగేళ్ల నుండి పదేళ్ల మధ్యన ఉంటే పిల్లలకు కావల్సిన సరాసరి నిద్ర పోయే వేళలు ఇలా ఉండాలి.

              4-5 ఏళ్ళ వయసు పిల్లలు - 11 గంటల 30 నిమిషాలు   
              5-8 ఏళ్ళ వయసు పిల్లలు - 11 గంటలు  
              8-10 ఏళ్ళ వయసు పిల్లలు -  10 గంటలు   

నిద్ర తక్కువయిన పిల్లల్లో పెద్ద వారిలో ఉన్నట్టే మంపుగా ఉంటుంది. మనసు నిలకడగా లేక పోవటం వల్ల ఏ పని మీదా ధ్యాస పెట్టలేరు. జ్ఞాపకం తగ్గటం, నిర్ణయాత్మక శక్తి లోపిస్తుంది. ఇవ్వన్నీ నిద్ర సరిగా లేనందు వల్ల పిల్లలందరిలో కనిపించే సాధారణ లక్షణాలు. వీటికి అదనంగా కాస్త పెద్ద పిల్లలు అయితే దుడుకు స్వభావాన్ని చూపిస్తారు. చిన్న పిల్లలు అయితే కొంత మంది మందంగా ఉంటారు. చీటికి మాటికి ఏడుస్తూ నస పెడు తుంటారు. కారణం లేకుండా ఏ చంటి బిడ్డ అయినా నస పెడుతుంటే ముందుగా ఆలోంచాల్సింది బిడ్డకు నిద్ర చాల లేదని, ఎదిగే పిల్లలకు రోజుల తరబడి నిద్ర తక్కువ అయినప్పుడు శరీర పెరుగుదల కూడా మందగిస్తుంది. ఆధునిక జీవన విధానంలో వచ్చిన మార్పులు అందరి లోనూ నిద్ర గంటలను తగ్గటానికి కారణాలు అవుతున్నాయి. టీవీ సంస్కృతి వచ్చాక చాలా మంది పిల్లలు వారికి వారుగా త్వరగా నిద్ర పోరు. సెలవుల్లో అయితే ఫరవా లేదు. కానీ బడి ఉన్నప్పుడు వారిని పొద్దునే నిద్రలేపి పంపాల్సి వుంటుంది. అలాంటప్పుడు వారికి నిద్ర చాలదు.పిల్లల్లో ఆరోగ్యకరమైన నిద్ర అలవాట్లను చాలా చిన్న వయస్సు నుండే అలవాటు చేయాలి. ఇలా అలవాటు చేయటాన్ని వైద్య పరిభాషలో ‘బెడ్ రొటీన్స్’ అంటారు. రాత్రి భోజనం అయ్యాక వారితో కబుర్లాడటం, నిద్ర పోవటానికి ముందు పళ్లు తోము కోవటం, స్నానం చేయించటం, పడక దుస్తులు తొడగటం లాంటివి ప్రతిరోజూ ఒక నిర్ణీత సమయంలో చేయించాలి. పడక మీదకు చేరానే బొమ్మల పుస్తకాలు తిరగెయ్యటం, కథలు చెప్పించుకోవటాన్ని ప్రోత్సహించాలి. ఈ పనులన్నీ ఒకదాని తరువాత ఒకటిగా వరుస క్రమం మారకుండా ప్రతి రోజూ చేయించాలి. ఈ మొత్తం ప్రహసనం కనీసం అర గంటకు తక్కువ కాకుండా ఉండాలి. ఇలా చేయించటం వల్ల ఆ పని మొదలు పెట్టినప్పటి నుండి వారికి తెలియ కుండానే నిద్రకు ఉపక్రమిస్తారు. ఇలా చేయటం వల్ల వారిలో నిద్ర వేళలు గట్టి పడతాయి. కొన్ని పద్ధతులను పాటించటం వల్ల పిల్లల్లో నిద్ర సమస్యలు రాకుండా జాగ్రత్త పడ వచ్చు.

  1. వయస్సుకు తగ్గట్టు పిల్లల్ని నిద్ర పోయేటట్టు అలవాటు చేయాలి
  2. సెలవులతో సంబంధం లేకుండా ప్రతిరోజూ పడుకోవటం, లేవటంలో ఒకే సమయాన్ని పాటించే విధంగా చూడాలి.
  3. సెలవుల్లో పిల్లలు నిద్ర వేళలు క్రమం మారకుండా జాగ్రత్త పడాలి. ఒకవేళ మారినా, బడి తెరవటానికి కనీసం వారం రోజులు ముందు నుండి నిద్ర వేళల్ని సరిచేయాలి.
  4.  పిల్లల గదుల్లో టీవీలు, కంప్యూటర్లు, వీడియో గేములు లాంటివి ఉంచొద్దు. అలాగే నిద్ర వేళకు అర గంట ముందు వాటిని చూడనీయకూడదు. అరగంట ముందు చదవటం, హోం వర్కు చేయటం నిలిపేయాలి.
  5.  సాయంత్రాలలో, రాత్రిపూట పిల్లలు తినే ఆహారంలో జాగర్తలు పాటించాలి. సాయం కాలం తరువాత చాకోలేట్లు కోలా డ్రింకులు తాగనీయ వద్దు. వీటిలో ఉండే కీఫిన్ రోజువారీ నిద్రను చెడ గొడుతుంది.
  6.  పడుకునే మందు రిలాక్స్ కావటాన్ని పిల్లలు నేర్పించాలి. ‘బెడ్ రొటీన్స్’ అలవాటు చేయాలి
                                                
                                            


Wednesday, August 24, 2011

ముధురుతున్న జబ్బులకు ముందస్తు లక్షణాలు


కొంత మందికి ఆరోగ్యం పట్ల జాగర్త ఎక్కువ. ఒంట్లో చీమ చిటుక్కుమన్నా వెంటనే డాక్టర్ దగ్గరకు పరుగెత్తుతారు. వీరికి ఆరోగ్య సూత్రాలు చెప్పాల్సిన పనే లేదు. పాపం! ఎన్ని జాగర్తలు
  తీసు కోవాలో అన్నీ జాగర్తలు తీసుకుంటూ ఉంటారు. ఇంకొంత మంది ఆరోగ్యాన్ని అస్సలు పట్టించు కోరు నిర్లక్ష్యం ఎక్కువ. రోగం వస్తే ముదిరి పాకన పడేంత వరకూ కదలరు మెదలరు. మరి కొంత మంది అయితే కోరి కోరి ఆరోగ్యాన్ని పాడు చేసుకుంటారు. ఇప్పుడు మనం చెప్పు కోబోయేది అటు ఎక్కువ పట్టించుకునే వారి గురించి, అటు ఆరోగ్యాన్ని కోరి చెడగొట్టుకునే వారి గురించి కాదు. ఆరోగ్యాన్ని పట్టించు కోకుండా ముదరబెట్టుకునే వారి గురించి. 

అప్పటికి అప్పుడు వచ్చే రోగాలు అయిన జ్వరం, దగ్గు, విరేచనాలు, నొప్పి లాంటివి కన పడినప్పుడు వాటిని భరించటం కష్టం కాబట్టి వెంటనే ఆసుపత్రికి వెళ్లి చూపించుకుంటారు. కానీ కొన్ని జబ్బులు వచ్చిన వెంటనే అసలు లక్షణాలు కన పడవు. ఎవరికి ఏ జబ్బు ఎప్పుడు వచ్చిందో కనుక్కోవటం కొంత కష్టమే అయినప్పటికీ కొన్ని పట్టింపులు, జాగర్తలు తీసుకుంటే నేరుగా కనపడని రోగాలను వీలున్నంత తొందరగా గుర్తించ వచ్చు. దాని వల్ల రోగం నుండి తొందరగా బయట పడటమే కాకుండా దీనికి అయ్యే ఖర్చును బాగా తగ్గించు కోవచ్చు. అలా మీ ఆరోగ్యాన్ని తీవ్ర జబ్బులకు గురి చేయ బోయే కొన్ని లక్షణాలు తెలుసు కోండి.

ఉన్నట్టుండి బరువు తగ్గటం:
మీరు బరువు తగ్గాలనే పట్టింపుతో తిండి మీద అదుపు పెట్టుకుంటూ ఒంటికి శ్రమను ఇచ్చి మీ ఇష్టప్రకారం బరువుతగ్గే సందర్భాలలో తప్ప అలాంటివి ఏమీ చేయకుండా మీరు బరువు తగ్గుటట్టు ఉంటే దాన్ని కాస్త గట్టిగానే గమనించాలి. అలవాట్లలో మార్పులేకుండా అప్పనంగా బరువుతగ్గడం మామూలుగా వీలు అయ్యే పని కాదు. గుర్తించదగిన కారణాలు ఏవీ లేకుండా ఆరునెలల కాలంలో 10 శాతం బరువు తగ్గారంటే మీ ఆరోగ్యం ఎక్కడో చెడిపోతుందని అర్థం. కాన్సరు, మధుమేహం, హైపరు థయరాయిడిజిం, దిగులు, కాలేయ సంబంధ జబ్బులు, తిండి అరుగుదల సమస్యలతోపాటు అరిగిన తిండి ఒంటికి పట్టుటలో సమస్యలు ఉన్నట్టు పరిగణించాలి.

శ్వాసలో ఇబ్బందులు:
ఉన్నట్టుండి ఊపిరి ఆడక పోతేనో,. ఆయాసం వస్తేనో ఎలాగు వైద్యులు కలుస్తారు. కానీ మనం గుర్తించ లేని విధంగా సాధారణం కంటే ఎక్కువసార్లు ఊపిరి పీల్చటం లేదా తక్కువసార్లు ఊపిరి పీల్చటం అలాగే లోతుగా ఊపిరి పీల్చటం లేదా పైపైన పీల్చటం లోపల ముదురుతున్న జబ్బుకు తొలి లక్షణాలు కావొచ్చు. రక్తం లేక పోవటం, శ్వాస నాళంలో అడ్డంకులు, తక్కువ స్థాయిలో ఎప్పుడూ ఉండే ఉబ్బసం, ఊపిరి తిత్తుల్లో రక్తం గడ్డ కట్టటం లాంటి సమస్యలు తలెత్తి ఉండ వచ్చు. ఇవి కాక తెలియని మానసిక ఆందోళన అలజడితో సతమతమవుతూ ఉండి ఉండ వచ్చు.

తికమక పడటం, వ్యక్తిత్వంలో మార్పులు:
ఉన్నట్టుండి తికమక పడిపోవటం, కాస్సేపుఎక్కడ ఉన్నది. చుట్టూ ఏమి జరుగుతున్నదీ తెలియపోవటం, ఏకాగ్రత కుదరకపోవటం, విచిత్రంగా ప్రవర్తించటం, ఎప్పుడూ లేనిది ఉన్నట్టుండి కోపాన్ని ప్రదర్శించటం, ఆలోచనల్లో తేడా రావటం అనేవి మెదడులో జరిగి తిష్టవేసుకొని కూర్చున్న జబ్బులకు తొలి లక్షణాలు. ఇవి కొంతసేపు కనిపించి తిరిగి వాటంతట అవే తగ్గిపోవచ్చు. దాని అర్థం లోపల జబ్బు పోయిననది కాదు. కాబట్టి ఇలాంటి లక్షణాలు తొలిసారి కనిపించినా ఏమీ లేదని తేల్చేవరకు వాటిని గురించి పట్టంచుకోవాలి. పక్షవాతం, మూర్ఛ, మెదడులో పెరిగే కణుతులు, నెత్తురు గొట్టాలలో అడ్డంకులు ఏర్పడటం ఇలాంటి లక్షణాలకు కారణాలు అయి ఉంటాయి.

కొద్దిగా తిన్నా కడుపు నిండినట్టు ఉండటం:
మీరు ఎంత తింటే ఏ మేరకు కడుపు నిండినట్టు ఉంటందో మీకు ఒక అంచనా ఉంటుంది. దానికి భిన్నంగా కొద్దిగా తిన్నా కడుపు నిండినట్టు అనిపిస్తున్నా వేళకు ముందే ఆకలి అనిపిస్తుంటేనే దాన్ని గురించి కొంత పట్టించు కోవాలి. రోజుల తరబడి పులి తేపులు రావటం, కడుపు ఉబ్బరంగా ఉండటం లాంటి లక్షణాలు జీర్ణవ్యవస్థలో ముదిరే జబ్బుకు ముందస్తు లక్షణాలు. అవి అతి సాధారణమైన అసిడిటీ నుండి పాంక్రియాటీకు కాన్సరు వరకూ ఏదయినా కావొచ్చు.

కళ్ళు ముందు మిరుమిట్లు:
కళ్ల ముందు మిరుమిట్లు కనపడటం, చుక్కలు కన పడటం, ఉన్నట్టుండి కాసేపు చీకటిగా మారటం, కళ్ళ ముందు తెరలు తెరలుగా కనపడటం వెనుక ఒక కారణం ఉంటుంది. అవి అతి సాధారణము అయిన మైగ్రయిను తలనొప్పి నుండి అత్యంత ప్రమాదకరము, అత్యవసర చికిత్స అవసరమైన కంటి లోపలి రెటినా ఊడి పోవటం వరకు ఏదయినా కావొచ్చు.
పైన చెప్పిన వాటిలో లక్షణాలు కనపడినప్పుడు పట్టించు కోక పోయినా సొంత వైద్యముతో తాత్సారం చేసినా కోలు కోలేని నష్టం జరగవచ్చు. కాబట్టి ఈ లక్షణాలు ఎక్కువ రోజులుగా ఉంటే వైద్య సలహాలు పొంది ఇబ్బంది లేదని నిర్థారించు కోవాలి.



                                               
                                                            24-08.2011

Wednesday, August 17, 2011

ఊబకాయం మనుషుల్లోనే ఎందుకు ఉంటుంది?

శాస్త్ర సాంకేతిక పరిజ్ఞానం పుణ్యమా అని రోజు రోజుకు అందుబా టులోకి వస్తున్న వినిమయ వస్తువుల వల్ల కానీ లేదా మన తరఫున పని చేసి పెట్టడానికి సేవారంగాలు అందుబాటు లోకి రావటం మూలాన అయితేనేమి కాలు కదపకుండా పనులు జరగ టానికి వెసులుబాటు కలుగు తోంది.

అయితే గమనించాల్సింది ఏమిటంటే వీటిని అవసరాలకు తగ్గట్టు పొదుపుగా జాగ్రత్తగా వాడు కోకుండా ఉన్నాయి కదా! ఇష్టం వచ్చినట్టు విచ్చల విడిగా వాటిమీద ఆధార పడి సుఖాన్ని మూట కట్టుకుంటూ ఉంటే తెలియ కుండానే దానికి సమానమయిన కష్టాలను, నష్టాలను కూడా భరించాల్సి ఉంటుంది. కాకుంటే ఆ కష్టాలు, నష్టాలు నేరుగా మనకు కన పడవు.
మనం అనుభవించే సుఖాల మాటున మనకు తెలియ కుండానే జరిగే అలాంటి కష్ట నష్టాలలో ఊబకాయం కూడా ఒకటి. ఇది భూమి మీద ఉండే జీవరాసుల్లో వాటికి లేనిదీ, కేవలం మనిషికి మాత్రమే ఉండే సమస్య ఊబకాయం. ప్రపంచంలో ఏ జంతువు కూడా అది ఉండాల్సిన దాని కంటే ఒక్క పిసరు కూడా ఎక్కువ లావు కావు. మరి మనుషులు మాత్రమే ఎందుకు లావు అవుతున్నారని తరచి చూసుకోవాలి.
మనిషి తోసహా అన్ని జంతువులకు పుట్టేటప్పుడే పెరిగి పెద్దయ్యాక ఎంత ఎత్తు, ఎంత బరువు ఉండాలనే మాస్టర్లు ప్లాను వాటి జన్యువుల్లో రాసి పెట్టి ఉంటుంది. దానికి తగ్గట్టు ఆ జీవి జీవన విధానం ఉంటుంది. అంటే ఆ జీవి పడే శరీర కష్టం, దానికి తగ్గట్టు తినటం అనే వాటి మధ్య పొంతన ఉంటుంది. జంతువులు ఆ తూకాన్ని పొర పాటున కూడా అతిక్రమించవు. అవసరాన్నిబట్టే తింటాయి తప్ప అదనంగా తిననుగాక తినవు. కాబట్టే అవి లావు పెరగవు.
ఆకలి మీద ఉన్న ఒక ఆవును ముందు ఎండుగడ్డి వేస్తే అది చాలినంత వరకూ తిని ఆపేస్తుంది. వెంటనే ఎండుగడ్డి తీసి పచ్చగడ్డి వేసినా వాసన చూసి గమ్మున ఉండిపోతుందే తప్ప పచ్చగడ్డి కదా! అని దాన్ని ముట్టను కూడా ముట్టదు. తిరిగి ఆకలి అయినప్పుడు (శరీరంలో గ్లూకోజు శాతం పడిపోయినప్పుడు) మాత్రమే తినటం మొదలు పెడుతుంది. మరి అదే మనుషులు అయితే పచ్చడి మెతుకులతో కడుపునిండా తిన్నాక వెంటనే ఘుమ ఘుమ లాడే బిర్యాని పెడితే కడుపులో ఖాళీ లేక పోయినా కనీసం రెండు ముద్దలు నోట్లోకి తీసు కోకుండా ఎంత మంది ఉండ గలరు?

ముందు చెప్పినట్లు మనం పుట్టేటప్పుడే మన శరీర శ్రమకు తగ్గట్టు ఆకలి ఉండటం అనే సమతా స్థితిని ప్రకృతి మన శరీరంలో అమర్చి పెడుతుంది. అంటే ఎక్కువ శ్రమ చేస్తే ఎక్కువ ఆకలి, తక్కువ శ్రమ చేస్తే తక్కువ ఆకలి ఉండే విధంగా. సాధారణంగా వీటి మధ్య తూకం దెబ్బ తినకూడదు. కానీ మన ప్రవర్తనతో ప్రకృతి అమర్చిన ఆ సెట్టింగులను మనకు తగ్గట్టు మనం మార్చి పడేస్తాను. దానితో అటు బరువు పెరగటం కానీ, ఇటు తగ్గటం కానీ జరుగుతుంది. తిండి తినటాన్ని అలాగే ఉంచే పని తక్కువ చేశామనుకోండి. పనికి ఉపయోగ పడిన తిండి పోగా మిగిలిన తిండి ఒంట్లో పేరుకు పోతుంది. లేదా పనిని అలాగే ఉంచి తిండి అవసరానికి మించి తిన్నా అదనంగా తిన్న తిండి శరీరంలో పేరుకుపోతుంది


తగ్గిన ఒంటి కదలికలు:
ఆర్థిక స్థితి బాగ లేనప్పుడు ఆఫీసుకు పోవాలంటే ఇంటి నుండి అరకిలో మీటరు దూరంలో ఉన్న రోడ్డు వరకూ నడుచు కుంటూ పోయి అక్కడ బస్సు కానీ, ఆటో కాని ఎక్కి ఆఫీసుకు దగ్గరగా ఉన్న స్టేజీలో దిగి నడుచుకుంటూ పోతారు. కానీ ఇప్పుడు స్థితి మారి బైకు కొంటే ఇంటి దగ్గర కిక్కు కొడితే ఆఫీసు ముందు ఆగుతుంది. కాబట్టి గతంలో మాదిరి నడిచే అలవాటు పోయినట్టే. శరీర శ్రమ తగ్గింది. పనికి తగ్గట్టు తిండి ఏమైనా తగ్గిందా అంటే అదేమీ లేదు. కాబట్టి జరిగే పరిణామం ఏమిటి? కొవ్వు పెరగటం. అంటే లావు కావటం. తిండి మామూలుగా తింటున్నా లావు కావటానికి తెలయకుండానే కారణమయ్యే ఇలాంటి జీవన విధానాలు కొన్ని...

  • స్కూలు పిల్లలు ఇంటి దగ్గర వ్యాను/ఆటో ఎక్కి స్కూలు దగ్గర దిగటం.
  • హాలుకు పోకుండా ఇంట్లోనే కూర్చుని టీవీలో సినిమాలు, సీరియళ్ళు చూడటం.
  • పిల్లలు బయట ఆడుకోకుండా ఇంట్లోనే కంప్యూటర్లు, వీడియో గేములు ఆడుకోవటం.
  • మోటారు బైకులు కొన్నాక నడిచే లేదా సైకిలు తొక్కే అలవాటు తగ్గటం.
  • మిక్సీలు, గ్రైండర్లు వచ్చాక రుబ్బే/నూరే/దంచే అలవాటు పోవటం.
  • వాషింగు మిషన్లు రాకతో బట్టలు ఉతికే పని లేకపోవటం.
  • పనిమనిషిని పెట్టుకొని ఇంట్లో పనులు తగ్గించుకోవటం.
  • బయటకు పోయి సరుకులు తెచ్చుకోకుండా డోరు డెలివరీలు అందుబాటులోకి రావటం.
  • మనుషుల్ని కలవను బయటకు పోవటానికి బదులు సెల్లు ఫోనులు అందుబాటులోకి రావటం.
  • బిల్లులు కట్టటానికి, ప్రయాణపు రిజర్వేషన్లకు బయటకు కదలకుండా ఇంటర్‌నెట్టులోనే చేసుకొనే వెసులుబాటురావటం.
  • చిన్నచిన్న దూరాలకు కూడా నడిచిపోకుండా ఆటోలు, బైకులు వాడటం.
ఇలా రాసు కుంటూ పోవాలే కానీ కోకొల్లలుగా శరీరాన్ని కదలనివ్వ కుండా పనులు జరిగి పోయే ప్రతి పనీ మనం ఖర్చు చేయాల్సిన కాలరీలను ఒంట్లో మిగుల్చుకోవటం వల్ల అదనంగా కొవ్వు పేరుకు పోతుంది. మరి లావు కాక ఏమవు తారు?
తిండితో తిప్పలు
ఇక తిండి సంగతికి వస్తే మారిన జీవన సరళి వల్ల అది కూడా లావు కావటానికి ఇతోధికంగా తోడ్పడుతుంది. ఎప్పుడు పడితే అప్పుడు, ఎక్కడ పడితే అక్కడ దొరికే రెడీమేడ్ ఫుడ్స్. అందు లోనూ ఎక్కువ కొవ్వు నూనెలతో చేసిన పిజ్జాలు, బర్గర్లు, చాక్‌లెట్లు, ఇక చెప్పేది ఏముందీ? ఇంట్లోకి అదనపు కేలరీలను ఎక్కించే ఇలాంటివే కొన్ని.
  • ప్రతి సంఘటనకూ పార్టీలు ఇచ్చే వరవడివల్ల విందులు ఎక్కువ అవటం.
  • ఏ ఇంటికి పోయినా తినటానికి ఏదో ఒకటి పెట్టటం, వాటిని తినటం.
  • ఇంటికి వచ్చిన వారికి మర్యాదపూర్వకంగా ఇచ్చే నీళ్ళు, మజ్జిగ స్థానంలో ఎక్కువ కాలరీలు ఉండే కూల్‌డ్రింక్స్ ఆక్రమించటం. అలాగే స్వీట్లు పెట్టటం.
  • తరచూ హోటళ్ళకు పోవటం అక్కడ తిండి ఎక్కువ కావటం.
  • మందుకొట్టే వారు మంచింగు రూపంలో ఎక్కువ తినటం.
  • టీవీ ప్రచార మాయలో ఉన్న పిల్లలు చాక్‌లెట్లు, చిప్స్, కురుకురేలు, క్రీం బిస్కట్లు ఎక్కువగా తినటం.
  • టీవీ చూస్తూ తినటంవల్ల ఎంత తింటున్నామో తెలియకపోవడం.
  • మగ వారికి పార్టీలు ఎక్కువ కావటం.
  • చిరు తిండిగా తినే సాంప్రదాయ పిండి వంటల స్థానంలో ఎక్కువ కొవ్వు ఉండే పిజ్జాలు, బెర్గర్లు, పావు బాజీలు రావటం.
  • అర్ధరాత్రి వరకు మేలుకొని ఉండటం వల్ల రాత్రి భోజనం తరువాత కూడా ఏదో ఒకటి తింటూ ఉండటం.
  • మాంసాహార వాడకం ఎక్కువ అయినప్పుడు నోరు అదుపు తప్పటం. 
చూశారు కదా! కారణం కనపడకుండా లావు కావటానికి వెతకాలే కాని ఇలాంటివి బోలెడు కనిపిస్తాయి. అందుకే జాగ్రత్త సుమా.



                                                      
                                                                 17-08-2011
                                                            

Sunday, May 29, 2011

నస నాగయ్యలకు నిద్ర తక్కువ!

పిల్లలు అన్నాక ఏదో ఒకదానికి పేచీ పెట్టటం, నస పెట్టటం మామూలే. ఎప్పుడో ఒకసారి నాసా పెడితే ఏదో ఒకటి చేసి బుజ్జగించటం ప్రతి తల్లిదండ్రికి అనవాయితినే. అయితే కొంతమంది పిల్లలు అయిన దానికి కాని దానికి తెగ నాసా పెట్టేస్తుంటారు. ఈ అలవాటును మానిపించాలని ఎంత ప్రయత్నించినా నస మానిపించటం వీలుకాక పోవచ్చు. చాల సార్లు వీరి నసను భరించలేని తల్లిదండ్రులు పిల్లల వీపు విమానం మోత మోగించే సందర్భాలు ఉంటాయి.  పిల్లల్లో ఉండే ఇలాంటి ప్రవర్తనకు కారణాలు గుర్తించి దాన్ని మలుపు తిప్పకపోతే కారణాన్ని బట్టి శారీరక ఎదుగుదలలో, వ్యక్తిత్వ రూపు దిద్దుకోవటంలో తేడాలు రావచ్చు. అలవాటుగా నస పెట్టె పిల్లల్ని జాగర్తగా గమనిస్తే నస ప్రవర్తనకు ప్రధానంగా రెండు కారణాలు కనిపిస్తాయి. వాటిలో తోలి కారణం  పెంపకంలో లోపం ఒకటి కాగా, మలి కారణం పిల్లలకు నిద్ర చాలకపోవటం.

తల్లిదండ్రులు లేదా కుటుంబ సభ్యులు పిల్లల్ని అతిగా గారాబం చేయడంవల్ల మొండితనం అలవాటు అవుతుంది. ఇలా పెరిగే పిల్లలకు పట్టు విడుపులు అలవాటు కావు.  కుటుంభం మొత్తానికి తనే కేంద్రం అనే భావన వారిలో నాటుకుపోతుంది. దానితో తాము ఆడింది ఆటగా, పాడింది పాటగా అనుకుంటారు. వారు కోరింది సమకూర్చి పెడితే సరి. లేదంటే రచ్చకు దిగుతారు.  కోరింది సమకూర్చి పెట్టటం అన్ని సందర్భాలలో తల్లిదండ్రులకు వీలుకాక పోవచ్చు. అలాంటప్పుడు సాధించుకునే మనస్తత్వం అలవడుతున్న పిల్లలు పేచీకి దిగుతారు. అనుకున్నది సాధించుకోవడానికి తల్లిదండ్రుల మెడలు వంచటానికి వారికి ఉన్న ఒకే ఒక దారి నస పెట్టటం. రానురాను ఇది అలవాటుగా మారుతుంది. ఇలాంటి ప్రవర్తన లేత దశలోనే గుర్తించి కట్టడి చేయకపోతే వారి వ్యక్తిత్వ ఎదుగుదలతో ఈ ప్రవర్తన అలాగే నిలిచిపోతుంది. కాకుంటే పెద్ద అయ్యాక నస పెట్టే రూపం మారవచ్చు.

ఇక రెండో రకం, పిల్లల్లో ముందు చెప్పిన సమస్య లేకపోయినా అప్పుడప్పుడు కాని, తరచూ కాని నస పిల్లలుగా మారుతారు. ఈ పిల్లల్ని పెంపకంలో లోపం అయితే ఏమీ ఉండడు. పిల్లలు కూడా సాధారణంగా నస పెట్టె రకాలు కాదు. ఎలాంటి పిల్లలు నస పెట్టటానికి కారణం వారికి తగినంత నిద్ర లేకపోవటమే. పిల్లలు వారి వయసుకు తగ్గట్టు తగినంత సేపు నిద్ర పొతే, రోజంతా హుషారుగా, చలాకీగా ఉంటారు. నిద్ర చాలనప్పుడు వచ్చే అనేక సమస్యలతోపాటు నస పెట్టటం కూడా ఒకటి. 

పిల్లల ఎదుగుదలలో తిండి తరువాత నిద్ర అత్యంత అవసరం. అటు శరీర పెరుగుదల, మెదడు వికసించటం రెండూ దాదాపు నిద్రలోనే జరుగుతుంది. నిద్ర విషయంలో పెద్ద వారిలాగే పిల్లలు కూడా ఎవరికి వారు ప్రత్యేకమే. నిద్ర తగ్గిన పిల్లల్లో ఎదుగుదల సమస్యలతో పాటు ప్రవర్తనలో కూడా తేడా కనపడుతుంది. అయితే ఈ తేడా చంటి పిల్లల్లో ఒక రకంగా ఉంటుంది. పెద్ద పిల్లల్లో మరో రకంగా ఉంటుంది. చంటిపిల్లలు అయితే నిద్ర చాలనప్పుడు ఊరికే ఏడుస్తూ ఉంటారు. అదే పెద్దపిల్లలు నస పెడుతూ ఉంటారు.

ఎవరు ఎంతసేపు నిద్ర పోవాలనే దాంట్లో కొంత మినహాయింపులు ఉన్నప్పటికీ, నాలుగేళ్ళ నుండి పదేళ్ళ మధ్యన ఉండే పిల్లలకు కావలసినన్ని సరాసరి నిద్రపోయే వేళలు ఇలా ఉండాలి.
   
  వయసు                       నిద్ర వేళలు గంటల్లో 
   4 - 5 సంవత్సరాలు                  11. 5 
   5 - 8 సంవత్సరాలు                  11
   8 - 10 సంవత్సరాలు                10

నిద్ర తక్కువయిన పిల్లల్లో పెద్దవారిలో ఉన్నట్టే మంపుగా ఉంటుంది. మనసు నిలకడగా లేకపోవడంవల్ల దేనిమీదా ధ్యాస పెట్టలేరు. జ్ఞాపకం తగ్గటం, నిర్ణయాత్మక శక్తి లోపిస్తుంది. ఇవన్నీ నిద్ర సరిగ్గా లేనందువల్ల పిల్లల్దరిలో కనిపించే సాధారణ లక్షణం. వీటికి అదనంగా కాస్త పెద్ద పిల్లలు అయితే దుడుకు స్వభావాన్ని చూపిస్తారు. చిన్నపిల్లలు అయితే కొంతమంది మందంగా ఉంటారు. చీటికిమాటికి ఏడుస్తూ నస పెడుతుంటారు. కారణం లేకుండా ఏ చంటి బిడ్డ అయినా నస పెడుతుంటే ముందుగా ఆలోచించాల్సింది బిడ్డకు నిద్ర చాలలేదని. ఎదిగే పిల్లలకు రోజులతరబడి నిద్ర తక్కువ అయినప్పుడు శరీర పెరుగుదల కూడా మందగిస్తుంది.

ఆధునిక జీవన విధానంలో వచ్చిన మార్పులు అందరిలోనూ నిద్ర గంటలను తగ్గటానికి కారణాలు అవుతున్నాయి. టీవీ సంస్కృతి వచ్చాక చాలామంది పిల్లలు వారికి వారుగా త్వరగా నిద్రపోరు. సెలవుల్లో అయితే పరవాలేదు కానీ బడి ఉన్నప్పుడు వారిని పొద్దునే్న నిద్రలేపి పంపాల్సి ఉంటుంది. అలాంటప్పుడు వారికి నిద్ర చాలదు.

పిల్లల్లో ఆరోగ్యకరమైన నిద్ర అలవాట్లను చాలా చిన్న వయసు నుండే అలవాటు చేయాలి. ఇలా అలవాటు చేయటాన్ని వైద్య పరిభాషలో ‘బెడ్ రొటీన్స్’ అంటారు. రాత్రి భోజనం అయ్యాక వారితో కబుర్లాడటం, నిద్ర పోవటానికి ముందు పళ్ళు తోముకోవటం, స్నానం చేయటం, పడక దుస్తులు తొడగటం లాంటివి ప్రతిరోజూ విధిగా ఒక నిర్ణీత సమయంలో చేయించాలి. పడకమీదకు చేరగానే బొమ్మలు పుస్తకాలు తిరగెయ్యటం, కథలు చెప్పించుకోవటాన్ని ప్రోత్సహించాలి. ఈ పనులన్ని ఒకదాని తరువాత ఒకటిగా వరుస క్రమం మారకుండా ప్రతిరోజు చేయించాలి. ఈ మొత్తం ప్రవహసనం కనీసం అరగంటకు తక్కువ కాకుండా ఉండాలి. ఇలా చేయించడంవల్ల ఆ పని మొదలు పెట్టినప్పటి నుండి వారికి తెలయకుండానే నిద్రకు ఉపక్రమిస్తారు. ఎలా చేయటం వల్ల వారిలో నిద్ర వేళలు గట్టి పడుతాయి. కొన్ని పద్ధతులు పాటించటం వల్ల పిల్లల్లో నిద్ర సమస్యలు రాకుండా జాగర్త పడవచ్చు. 
  • వయసుకు తగ్గాట్టు పిల్లలు నిద్ర పోయే విధంగా అలవాటు చేయాలి. అంటే నిద్ర తక్కువ కాకూడదు. 
  • సెలవులతో సంబంధం లేకుండా ప్రతి రోజూ ఒకే వేళకు పడుకోవట, లేవటం అలవాటు చేయాలి.
  • సెలవుల్లో పిల్లల నిద్ర వేళలు మారకుండా జాగర్త పడాలి. ఒక వేళ మారినా, బడి తెరవటానికి వారం ముందు నుంచే నిద్ర వేళలని తిరిగి సరిచేయాలి.
  • పిల్లల రూముల్లో టీవీలు, కంప్యూటర్లు, వీడియొ గేములు లాంటివి ఉంచకూడదు. నిద్ర వేళలకు కనీసం అరగంట ముందు వాటిని కట్టేయాలి. 
  • సాయం కాలాలు, రాత్రులలో పిల్లల తినే తిండిలో చాకొలేట్స్  కోలా తాగుళ్ళు,(పెప్సి, థామస్ అప్)  లాంటివి లేకుండా జాగర్త పడాలి. వీటిలో ఉండే కెఫీన్ సహజంగా పట్టే నిద్రను చెడగొడుతుంది.
  • పాడుకొనే ముందు రిలాక్స్ కావటాన్ని పిల్లలకు నేర్పించాలి.
  • బెడ్ రోటీన్స్ ని పాటించే విధంగా వారిని తయారు చేయాలి.  

చివరిగా ఓ మడత ఏమిటంటే పెద్దవారు కూడా నిద్ర తగ్గితే నస పెడతారు. కాకుంటే పిల్లలంతా ఘోరంగా ఉండదు.

https://blogger.googleusercontent.com/img/b/R29vZ2xl/AVvXsEhkpWsXg3M5_9IN10tY60yy1FS7fOWcdd069g5fNUbXVkYpXjJr1ATO1M1LTtL85kwaGeNDW68PfUMo1P3Hrk5cd6GgdkHJp57Fly54rb4VhxkA7ALw-k7Bq4KFS14LoBdXBYuJ0_aFoqQ/s200/andhrabhoomi_logo.jpg
25 మే 2011 


Friday, May 13, 2011

ప్రేమికులను విడదీయటం ఎలా ?

ఆడక: నేనో రచయిత్రిని. చాలా మంది వారి వారి సమస్యలతో నా దగ్గరకు వస్తుంటారు. ప్రస్తుతం నా దగ్గర ఉన్న సమస్య. మా ఫ్రెండు వాళ్ళ అబ్బాయి లవ్వులో పడ్డాడు. మనం ఆ అమ్మాయిని మరిచి పోయేటట్టు చేయవచ్చా? ఎన్నాళ్ళోలో?
                                                                       
                                                                            - యలమర్తి అనూరాధ, పెనుగొండ, తూ.గో జిల్లా

బదులు: ప్రేమలో పడ్డ అబ్బాయి వయసు, చదువు, చేసే పని ప్రేమించిన అమ్మాయి తాలుకు వివరాలు రాయలేదు. నిర్ణయాలు తీసుకోగలిగిన వయసు, సంపాదనలో నిలకడ ఉన్న వ్యక్తి మంచి అమ్మాయిని ఇష్టపడితే పెళ్ళి చేసుకోనివ్వక మరిపింప చేయటం ఎందుకూ?

ఈడు వయసు పిల్లలకు సహజంగానే ‘అపోజిట్ సెక్స్’ పట్ల అంటే అబ్బాయిలకు అమ్మాయిలపై, అమ్మాయిలకు అబ్బాయిలపై కొంత ఆకర్షణ ఉండటం సహజం. దీనినే ప్రేమగా వారు భావిస్తారు. ఇప్పుడు పెద్దవాళ్ళుగా ఉన్నవారు అలాంటి దశలో నుండి వచ్చినవారే. చాలా సందర్భాల్లో ఇలాంటి వాటి గురించి పెద్దగా పట్టించుకోకూడదు. వయసు పెరిగే కొద్ది ఎవరికి వారే ఈ భ్రమల నుండి బయట పడతారు. అలా కాకుండా వయసుకు మించిన ప్రవర్తన, చేష్టలు ఉన్నప్పుడు కొంత కట్టడి చేయాల్సి ఉంటుంది. మరీ అంత సమస్యగా నిపుణుల దగ్గరకు కౌన్సిలింగ్ తీసుకు వెళ్ళమని సలహా ఇవ్వండి.


...................................................................................................................................

ఆడక: మా బాబు వయసు నాలుగేళ్ళు. చాలా తెలివిగలవాడు. చురుగ్గా ఉంటాడు. మాటల పుట్ట. కాకుంటే కొన్ని పదాలు సరిగ్గా పలకలేక జారవిడుస్తాడు. మాట్లాటేటప్పుడు నాలుకు మందం అవుతున్నట్టు మనకు అనిపిస్తుంది. ‘ట’ ని ‘త’గా పలుకుతాడు. ‘అటక’ని ‘అతక’గా పలుకుతాడు. అలాగే ‘ర, డ’ అక్షరాలు, వాటి గుణింతాల పదాలను కూడా పలకలేడు. ‘ల’ని సగమే పలుకుతాడు. మా ప్రాంతంలో ఉన్న పిల్లల డాక్టరుకు చూపిస్తే వస్తాయిలే అని ‘మోంటాడ్’ అనే మందును రాసి ఇచ్చాడు. వాడుతున్నాం. అయినా ఉపయోగం లేదు. మా వాడి మాటలు విన్న కొందరు ఇది మామూలే, వయసుతో పాటు వస్తాయి అంటున్నారు. కొందరేమో స్పీచ్ థెరపీ ఇప్పించమంటున్నారు. మాకు సలహా ఇవ్వగలరు.

                                                                                                         - అనుపమ, శ్రీకాకుళం


బదులు: మీ అబ్బాయికి బహుశాః నాలుక కింద ఈనె (ఫ్రెన్యులం) లాగా ఉన్న భాగం మందంగా ఉండి అడుగు భాగానికి అతుక్కుపోయి ఉంటుంది. దీనివల్ల నాలుక పూర్తిగా అన్ని వైపులకు తిరగలేదు. ముఖ్యంగా అంగలికి నాలుకకు కొస తగలదు. దీన్ని ‘టంగ్ టై’ అంటారు. పైన మీరు చెప్పిన అక్షరాలు అన్ని నాలుక చివరను అంగిలికి అంటించి పలకాల్సినవి. ‘టంగ్ టై’ ఉన్న వారికి నాలుక కొస అంగిలికి అంటుకోనందువల్ల సరిగ్గా పలుకలేరు. మీ అబ్బాయిని ఒకసారి ‘సర్జన్’కి చూపించండి. అతుక్కున్న భాగానికి చిన్న గాటు పెట్టడం ద్వారా నాలుకను పూర్తిగా విడుదల చేస్తారు. ఇలా చేయగానే మాటలు బాగా వస్తాయి. ఒకవేళ డాక్టరు అలాంటిది ఏమీ లేదని చెబితే మీ పిల్లవాడు అలవాటుగా అలా మాట్లాడుతూ ఉండి ఉండవచ్చు. అప్పుడు స్పీచ్ థెరపీ ఉపయోగపడుతుంది. బడికి పంపబోయేలోపల మాట సరిగ్గా పలకగలిగే విధంగా చెయ్యాలి. ‘మోంటాడ్’ మందును ఆపేయండి. దానవల్ల ఖర్చు తప్ప ఒరిగేది ఏమీ ఉండదు.

11 ఏప్రిల్ 2011